Hz. Mevlana

A nuk t’kam thanë?

A nuk t’kam thanë mos shko atje?

A nuk t’kam thanë që ty, veç unë të njoh?

A nuk t’kam thanë në këtë vend të vorfën, unë jam burimi e jetës tande?

Nëse nji ditë m’idhnohesh

Dhe merr kryet e shkon në nji vend njimijë vjet të largët

Vendi qe do bashkohesh kur ki mu kthy, jam unë, a nuk ta kam thanë?

A nuk t’kam thanë mos u kënaq me këta çka duket

A nuk t’kam thanë unë jam ai që ta ka ndërtu tendën që t’ka hije ty

Unë jam ai që ta kam zbukuru e stolisun atë, a nuk t’kam thanë?

A nuk t’kam thanë që unë jam nji deti

Ti je nji peshk, a nuk t’kam thanë?

A nuk t’kam thanë mos shko në ato vende t’thata,

Unë jam deti jot i pastër, a nuk t’kam thanë?

Mos bjer’ në kurthe si zogjtë, a nuk t’kam thanë?

A nuk t’kam thanë që unë jam ai qe ta ka mundësu me fluturu,

Unë jam krahu jot, a nuk t’kam thanë?

A nuk t’kam thanë që ta presin udhën,

A nuk t’kam thanë që te ftofin ty.

E unë jam zjarmi jot,

Unë jam ngrohtësia jote, a nuk t’kam thanë?

Të thojnë lloj-lloj gjanash, a nuk t’kam thanë?

Fiton sjellje të këqija, a nuk t’kam thanë?

E hup burimin e pa vdeksisë, a nuk t’kam thanë?

Pra me hup mu, a nuk t’kam thanë?

Ma thuej, a nuk t’i kam thanë tona këto?

AI PO VJEN, AI

Derdhni ujë udhëve

Jepnju myzhde bashqeve

Po vijnë aromat e beharit

Ai po vjen, ai...

Copa jonë e hanes, i dashtuni jonë, po vjen

Lirojeni udhën, hapnu

Qëndroni larg, qendroni

Fytyra e ndriçueme, e pastër

Tuj i lanë t'shrritne mbas vedi venat që i shkel

Ai po vjen, ai....

Copa jone e hanës, i dashtuni jonë, po vjen

Qiella e kaploi token, e mshtjelli për nji çast

Përnjiherë katër anët i mloi nji erë misku

Përnjiherë nji zhurmë, nji kijamet kërsiti n'rrokulli

Ai po vjen, ai....

Copa jone e hanës, i dashtuni jonë, po vjen

Përnjiherë bashqeve ju erdh shpirti, bashqet u nritën

Përnjeherë ju çelën sytë bashqeve

Përnjeherë neve s'na met as brengë, as mërzi, as vuejtje

Ai po vjen, ai...

Shigjeta fluturoi prej harkut

Veç se asht tu e arritun cakun

Bashqet ju nalen selames

Selvitë u çuen n'kamë

Ka dalë udhëve nëpër ledina t'gjelbërueme

Pra gonxha, ka hypun n'kalë e po vjen

E çka po presum na?

Ai po vjen, ai...

Copa jone e hanës, i dashtuni jonë, po vjen

Nëse vjen n'tonin rajon, ki me pa, o Shems

Na u asht ba huj neve veç me heshtë, me heshtë...

Për syte e tu t'bukun shpirti jem asht n'pritje

M'iku rahatia

Netëve, gjum s'më ka met, ikun m'ka

Eh, kqyre pra, ato ditët e mira kanë dalë, n'udhë tuj ardhun janë...

(përktheu nga turqishtja: Fatijona Bajraj)